Meänkieli

Kansaliskirjasto

Kuninkhaalinen kirjasto KB, oon Ruottin kansaliskirjasto. Se tarkottaa ette KB:n tehtävä oon koota ja säilyttää kaikki mitä Ruottissa painethaan. Aina vuesta 1661 kaikki jokka julkasevat painettua materiaalia häätyvät lähättää yhen niin sanotun velvolisuuskappalheen kaikesta painetusta KB:le.

Ruottin kokoelmassa oon materiaalia jota oon koottu kautta ajoitten. Täälä oon kirjoja, avisia, julistheita, karttoja, vyykorttia, nuottia, reklaamia, kataloogia, toimintakertomuksia ja muutaki. Rajat sille mitä koothaan laajentuvat vähä kertaa.

KB:n kokoelma oon kaikile, mutta ensikäessä sielä käypii oppilhaita, opettajia, tutkioita. Ruottin kokoelmaa ei saa lainata kotia, kirjoja ja muuta materiaalia häätyy lukea jossaki meän lukusalista. Kaikki kirjat oon kirjamakasiinissä ja net häätyy tilata sieltä.

Tutkiakirjasto

KB oon kans yks Euruupan johtavista hymanistisistä tutkiakirjastoista. Sillä kirjasto ostaa ajankohtasta ulkomaalaista tutkimuskirjalisuutta esimerkiksi arkeoloogin, histuurian, kirjalisuustietheen ja taitetietheen aloila.

Valtion virasto

Valtion virastonna Kuninkh. kirjastolla oon kansalinen vastuu siittä ette korkeampi koulutus ja tutkimus saavat informasjuunia ja ette sitä kehitethään. KB:lä oon kans kansalinen vastuu siittä ette kansalista kirjastokataloogia LIBRIS:tä hoiethaan ja kehitethään ja joka oon saatavilla Internetin kautta ja jossa oon rapeat viis miljoonaa titteliä 300:ssa Ruottin kirjastossa.

Käynti KB:ssä

Kirjasto oon auki kaikile. Se joka oon 18 vuotta ja jolla oon jällaava legitimasjuuni saapii lainata kokoelmasta.  Se joka oon alle 18 vuotta saattaa hakea KB:n daattabaasista, referensikirjoista ja lukea mikrofilmattuja päiväavisia ja lehtiä. Niile jokka ei ole kirjoila Ruottissa eli joila ei ole ruottalaista henkilönumeroa, jällaavat erityiset säänöt.

Aukioloaijat

Kesäaika jällaa 11 kesäkuuta-18 elokuuta (näkkyy parenteesissä).
Maanantai – tuorestai: 09–20 (9-18)
Perjantai: 09–19 (09-17)
Lauantai: 10–17 (11-15)
Pyhä: Kiini